,,Verða áhorfendur á leik Íslands og Rúmeníu á Laugardalsvellinum 26. mars? Fer sá leikur yfirleitt fram á þeim tíma?,“ skrifar Víðir Sigurðsson, fréttamaður á Morgunblaðinu í blað dagsins.
Þar veltir hann því fyrir sér hvort allar íþróttakeppnir á Íslandi og víðar séu á leið í frí vegna kórónuveirunnar. Ljóst má vera að stutt er í að áhorfendur verði bannaðir í íþróttahúsum um allt land. Líklegt er að leikjum verði frestað.
,,Verður þessu öllu saman frestað vegna kórónuveirunnar?“
,,Spyr sá sem ekki veit en líkurnar aukast dag frá degi. Í gær var fyrsta leiknum í enska fótboltanum frestað, og örugglega ekki þeim síðasta. Eflaust þarf að bíða með að ljúka flestum deildum þar til í sumar eða haust. Og fresta EM um einn til tvo mánuði.“
Hann segir líf borgara mikilvægara en kappleikir og bendir á að Pepsi Max-deildin gæti byrjað seinna í sumar.
,,Líf og heilsa og almennt öryggi borgaranna hefur forgang. Þeir sem eru í forystu íþróttahreyfingarinnar, hér á landi og á alþjóðavísu, skilja það sem betur fer flestir. Í stóra samhenginu er sjálfsagt að fresta íþróttaviðburðum, rétt eins og öðrum samkomum. Ef tvísýnt verður um að halda úrslitakeppnirnar innanlands í vor á að fresta þeim.“
,,Íslandsmótið í fótbolta getur byrjað í júní. Því lýkur þá bara seinna í haust. Við þurfum að vera með rétta forgangsröð.“
