Ný persóna birtist í Poldark, geðug, hlédræg og heiðarleg. Það er Morwenna. Óblíð örlög virðast bíða hennar. Slepjulegur og á allan hátt ógeðfelldur karlhlunkur girnist hana. Langlíklegast er að hún verið neydd í hjónaband með honum og eigi eftir að þjást skelfilega. Hún elskar ungan og fallegan mann en aðstæður eru þannig að þeim virðist skapað að skilja.

Þetta er ekki gott ástand og skapar ákveðna vanlíðan hjá okkur aðdáendum Poldark-þáttanna. Við höfum þurft að horfa upp á ýmislegt sorglegt í þessum þáttum, eins og þegar Demelza missti barnið sitt. Svo sáum við hið nánast ófyrirgefanlega framhjáhald Ross með Elísabetu. Það tók okkur tíma að jafna okkur á þeim ósköpum. Nú virðumst við þurfa að horfa upp á skelfilega óhamingju hinnar saklausu og blíðlyndu Morwennu. Auðvitað getur svosem verið að allt fari vel, en varasamt er að treysta því. Hið illa karlverldi hefur nefnilega nánast öll völd í þessum þáttum. Einstaka kona rís upp og berst af þrjósku, eins og Demelza. Aðrar gefast upp eins og Elísabet, sem ég sé ekki betur en að sé lögst í dagdrykkju. Hún sést óeðlilega oft vansæl á svip með glas í hendi. Morwenna er enn líklegri til að gefast upp. Hún virðist algjörlega varnarlaus.