„Við stöndum miklu betur en við höfum nokkurn tíma gert í sögu landsins,“ segir Heiðar Guðjónsson, fjárfestir og forstjóri Sýnar í viðtali við Bylgjuna í morgun. Töluverður samdráttur er orðinn í efnahagslífinu með tilheyrandi vaxandi atvinnuleysi. Loðnubrestur og samdráttur í ferðaþjónustu vega þungt. Heiðar segir lykilatriði að ráðist verði í innviðafjárfestingu.
„Stjórnvöld hafa þetta í hendi sér og geta bara farið í þær framkvæmdir sem fyrir liggja. Ef þau vilja ekki nota sína peninga þá á lífeyriskerfið fimm þúsund milljarða og er í vandræðum með að koma þeim fjármunum fyrir,“ segir Heiðar.
Heiðar bendir á að tvöföldum Reykjanesbrautar og ýmis fleiri verkefni af því tagi séu þjóðhagslega hagkvæm og gefi 15-20% ávöxtun. Nægur slaki sé í verktakabransanum til að fara í nokkur verkefni á sama tíma.
Heiðar hrósar Lilju Alfreðsdóttur menntamálaráðherra fyrir að stíga fram og leggja til 50 milljarða fjárfestingu í innviðaframkvæmdum. Hins vegar sé umræðan um þessi mál ótrúlega lítil á Alþingi:
„Mér líður oft eins og mér hafi verið boðið í matarboð en það er enginn matur, bara rosalega fínar skreytingar. Það eru allir að spá í aukahlutunum, skrautinu, en það er enginn að spá í því sem raunverulega skiptir máli. Auðvitað á að ræða um jafnréttismál og loftslagsmál en ef það er brýn þörf á að taka saman höndum og bregðast við því sem er að gerast í efnahagslífinu, einbeitum okkur þá að því í þrjá, fjóra eða fimm mánuði,“ segir Heiðar og bendir jafnframt á að gjaldeyrisforði þjóðarinnar sé 800 milljarðar og því til staðar nægir fjármunir til að ráðast í vinnviðaframkvæmdir.