Ein umdeildasta verksmiðja Íslands, kísilmálmverksmiðja United Silicon í Helguvík, hefur fallið hratt í verði. Hún er í eigu Arion banka, sem bókfærði hana á 6.9 milljarða í lok mars 2019.

Um áramótin var virði hennar fært niður í 2.7 milljarða, sem er lækkun upp á 4.2 milljarða. Þetta kemur fram í ársreikningi Arion banka og Kjarninn greinir frá.

Eignir og rekstur verksmiðjunnar voru færðar í dótturfélag Arion banka, Stakksberg, sem hugðist síðan selja reksturinn áfram. Stóð til að endurræsa verksmiðjuna, þrátt fyrir aukinn kostnað, mótmæli íbúa og viðbótarkostnað vegna nýs umhverfismats.

Þrátt fyrir þetta hækkaði bókfært virði verksmiðjunnar í bókhaldi Arion banka, en lækkaði síðan þegar nær dró áramótum.

Verksmiðjan hefur ekki verið starfhæf síðan september 2017 og eru taldar litlar líkur á að hún verði seld, þar sem óvissa er á mörkuðum með silicon og margir framleiðendur hafi hætt framleiðslu og lokað verksmiðjum sínum.

Kostnaður við uppsetningu verksmiðjunnar er talinn um 22 milljarðar króna.

Arion banki hefur þegar greitt 21 milljón í sekt vegna verksmiðjunnar, samkvæmt sátt við Fjármálaeftirlitið. Þar viðurkenndi Arion banki að láðst hafi að skrá greiningu hagsmunaárekstra í tengslum við kaup lífeyrissjóða á skuldabréfum á árinu 2015 og þátttöku þeirra í hlutafjárhækkunum Sameinaðs Sílikons hf. á árunum 2016 og 2017, með skipulegum og formlegum hætti.

Sjá nánar: Arion banki greiðir sekt vegna United Silicon