Bandaríski leikarinn, handritshöfundurinn, leikstjórinn og framleiðandinn Jordan Peele undirbýr nú nýja sjónvarpsþætti sem ætla má að muni vekja talsverða athygli.

Þættirnir sem um ræðir bera vinnuheitið The Hunt og gerast að mestu leyti í Bandaríkjunum. Þeir fjalla um leit manna að þýskum nasistum á áttunda áratug liðinnar aldar, hinum sömu og báru ábyrgð á voðaverkunum í síðari heimsstyrjöldinni. Þættirnir eru byggðir á sönnum atburðum en eftir síðari heimsstyrjöldina fluttu margir nasistar til Bandaríkjanna og settust þar að.

Peele, sem er 38 ára, hefur vakið talsverða athygli að undanförnu en hann sló fyrst í gegn í þáttunum Key & Peele á Comedy Central. Hans fyrsta verkefni sem leikstjóri var í hrollvekjunni Get Out sem sló rækilega í gegn fyrr á þessu ári.

Peele mun framleiða þættina en ekki liggur fyrir hvaða sjónvarpsstöð mun kaupa réttinn af þeim. Í frétt Hollywood Reporter kemur þó fram að margir hafi sýnt verkefninu áhuga.