„Þetta hefur verið hrikalega átakanlegt fyrir okkur öll. Ég hélt síðustu tónleika á gamlárskvöld í The Forum. Síðan datt ég illa og þurfti að fara í aðgerð á háls, sem ruglaði í öllum taugunum,“ segir myrkraprinsinn og eilífðarrokkarinn Ozzy Osbourne en hann hefur verið greindur með taugasjúkdóminn Parkinson. Frá þessu greindi hann sjálfur frá í viðtali við Good Morning America en þar sagðist hann hafa greinst með sjúkdóminn í febrúar á síðasta ári.
Ozzy greindist með tegund tvö af sjúkdómnum og segir hann að ekki sé um dauðadóm að ræða, þó sjúkdómurinn hafi óneitanlega alvarleg áhrif á líkamann. „Ég hafði aldrei heyrt um sársauka í taugum og það er skrítin tilfinning,“ segir tónlistarmaðurinn.
Eiginkona Ozzy, Sharon Osbourne, fylgdi honum í viðtalið og lýsti sjúkdómi eiginmanns síns þannig að góðum dögum fylgir einn hryllilega slæmur. Ozzy þurfti nýverið að fresta tónleikaferðalagi sínu um heiminn og hefur hann haldið sig innandyra til hvíldar á síðustu vikum. Hann fullyrðir þó að hann sé á batavegi og er bjartsýnn á framhaldið.
