Virginia Roberts Giuffre er ein þeirra kvenna sem segist hafa verið beitt kynferðislegu ofbeldi af Andrew Bretaprins í tengslum við vinskap hans og barnaníðingsins Jeffrey Epstein. Orðrómur hefur verið uppi um að bandaríska alríkislögreglan FBI ætli „að drepa hana til að vernda ofurríka og vel tengda fólkið“.

Þetta hefur borist Virginia til eyrna og hefur hún því í Twitterfærslu lagt áherslu á að hún sé „ekki í sjálfsvígshugleiðingum“ svona ef eitthvað skyldi koma fyrir hana því „mörg illmenni“ vilji þagga niður í henni. Sky skýrir frá þessu.

Virginia, sem er nú 36 ára, hefur margoft sagt að Epstein hafi selt aðgang að líkama hennar 2001 þegar hún var 17 ára. Hún hafi þá verið neydd til að stunda kynlíf með Andrew prins. Hann hefur þvertekið fyrir að hafa stundað kynlíf með henni eða átt í sambandi við hana og allar staðhæfingar um það séu lygi.

Ljósmynd er til af þeim saman en prinsinn segist ekki minnast þess að hafa hitt Virgina og segir ekki óhugsandi að myndin sé fölsuð.

Virginia kom fram í Panorama, fréttaskýringaþætti breska ríkissjónvarpsins, nýlega og ræddi þar um málið.

„Hann veit hvað gerðist. Ég veit hvað gerðist en bara annað okkar segir satt.“