Flugfélagið Play hafa gert ráð fyrir því að farþegar félagsins verði samtals 4,3 milljónir á næstu þremur árum. Greint var frá þessum áformum í Morgunblaðinu í dag en þar kemur einnig fram að Play ætli að flytja um 1,7 milljón ferðamanna til landsins.

Þetta eru háar tölur frá Play en Kristján Sigurjónsson á vefsíðunni Túristi.is var ekki sannfærður. „Þessar tvær stærðir ganga þó ekki upp í þessu samhengi nema þrír af hverjum fjórum farþegum Play verði erlendir ferðamenn,“ segir í frétt Túrista um málið. „Ástæðan er sú að flugfarþegar eru ávallt taldir á hverjum fluglegg, bæði þegar þeir fljúga til og frá landinu. Ferðamaðurinn er aftur á móti aðeins talinn einu sinni við landamærin.“

Túristi beindi þess vegna spurningu til Boga Guðmundssonar, eins af framkvæmdarstjórum Play, en hann var viðmælandi Morgunblaðsins. Túristi spurði hvort ekki væri réttara að tala um að Play gæti flutt 850 þúsund ferðamann til landsins en ekki 1,7 millónir. Bogi svaraði þessari fyrirspurn Túrista og sagði að þetta væri rétt athugað, ferðamannafjöldinn verði þá nær 900 þúsundum. Bogi segir svo að það hafi ekki verið ætlunin að villa um fyrir fólki.