Trump sagði að það væri ekki einfalt mál að láta setja þessi glæpasamtök á lista yfir hryðjuverkasamtök, það sé ákveðið ferli en það sé vel á veg komið.
Skömmu eftir að viðtalið var birt á heimasíðu O‘Reilly á þriðjudaginn sendi mexíkóska utanríkisráðuneytið frá sér tilkynningu. Í henni kom fram að þarlend stjórnvöld muni reyna að fá fund með æðstu embættismönnum Bandaríkjanna um vandann með eiturlyfjagengin og hvort og þá hvernig sé hægt að líta á þau sem hryðjuverkasamtök.
Ef fyrirætlanir Trump ganga eftir mega bandarískir ríkisborgarar ekki styðja við bakið á eiturlyfjahringjunum og meðlimir þeirra mega ekki koma til Bandaríkjanna. Fyrr í mánuðinum bauð Trump Mexíkó aðstoð við að „fjarlægja eiturlyfjahringana af yfirborði jarðar“. Það gerði hann eftir að níu bandarískir ríkisborgarar voru myrtir af liðsmönnum eiturlyfjagengis í Mexíkó.