Einn af okkar sterkustu kraftlyftinga- og aflraunamönnum, Kristján Sindri Níelsson, er samkynhneigður. Hann er einn af mjög fáum karlkyns íþróttamönnum sem er opinberlega samkynhneigður. Kristján Sindri var í viðtali hjá Íþróttum á sunnudegi á RÚV í gær.
Kristján Sindri kom út úr skápnum þegar hann var sautján ára og pælir að eigin sögn afskaplega lítið í því að hann sé samkynhneigður íþróttamaður.
„Ég sé þetta ekki sem hæfileika að vera samkynhneigður og horfi ekki þannig á það […] Ég kom út úr skápnum þegar ég var 17 ára,“ segir hann í viðtali við RÚV.
Sem betur fer hefur Kristján Sindri aldrei orðið fyrir fordómum.
„Mér líður í raun eins og öllum sé bara drullusama,“ segir hann og bætir við að það hefur enginn nefnt það sérstaklega við hann að hann sé samkynhneigður. „Einhverjir hafa minnst á það og að þetta sé nokkuð óhefðbundið en það er aldrei nein illgirni í því.“
Þrátt fyrir að hafa aldrei persónulega orðið fyrir fordómum þá viðurkennir hann að það verði eflaust margir fyrir þeim og hann telur fordóma, eða frekar hræðsluna við fordóma, vera ástæðuna fyrir því að svo fáir íþróttamenn komi út úr skápnum.