Phillip Williams, sem býr í Miami í Bandaríkjunum og er grænmetisæta, hefur stefnt hamborgarakeðjunni Burger King fyrir rétt. Ástæðan er að hann er ósáttur við að kjötlausir hamborgarar séu grillaðir á sama grilli og hefðbundnir hamborgarar úr kjöti.

Williams segist hafa keypt sér Impossible Whopper, sem er kjötlaus hamborgari, í bílalúgu hjá Burger King í Atlanta og hafi hann verið grillaður á sama grilli og hamborgarar úr kjöti. Hann telur að margir veitingastaðir keðjunnar geri viðskiptavinum ekki nægilega ljóst að kjötlausir hamborgarar séu grillaðir á sama grilli og venjulegir hamborgarar.

Talsmenn Burger King hafa ekki viljað tjá sig um málið. Á heimasíðu fyrirtækisins kemur fram að viðskiptavinir geti beðið um að fá kjötlausa borgara grillaða sér. Impossible Whopper er síðan lýst sem „100 prósent Whopper, 0 prósent kjöt“.

Fyrirtækið Impossible Foods, sem framleiðir borgarana, segir að þeir séu hugsaðir fyrir þá sem vilja innbyrða minna af dýraprótíni en sé ekki sérstaklega beint að grænmetisætum.