Í næsta þætti af Undir yfirborðið á Hringbraut skoðar þáttastjórnandinn Ásdís Olsen dáleiðslu. Hún ræðir meðal annars við Sigrúnu Björt, leikskólastjóra, sem segist hafa læknast af astma, ofnæmi og vefjagigt með dáleiðslu.

„Ég var búin að vera í rúm 20 ár að glíma við vefjagigt en þarna staldraði ég við, fórum yfir þessa þætti í huganum og viti menn, ég er laus við vefjagigt,“ segir Sigrún Björt í stiklu fyrir þáttinn.

Ásdís Olsen fer sjálf í dáleiðslu í þættinum hjá Ingibergi Þorkelssyni, skólastjóra Dáleiðsluskóla Íslands. Þetta var heldur betur upplifun fyrir Ásdísi, en hún kvaðst hafa verið í návist Guðs.

„Ég upplifði magnaða hluti í dáleiðslunni. Þú heldur örugglega að ég sé klikkuð og kannski er ég það, en þá er það mjög gott og eftirsóknarvert ástand get ég sagt þér,“ segir Ásdís á Hringbraut.

„Mér fannst Guð vera hjá mér og allt upplýst í kringum mig.  Mér fannst ég vera fullkomlega æðrulaus, örugg og óttalaus. Það var eins og egóið mitt gufaði upp og ég fann mig tilheyra, vera hluta af öllu og fann þennan óendanlega kærleika og löngun til að elska og þjóna.“

Í þættinum er einnig rætt við Sturla Johnsen heimilislækni sem segir dáleiðslu geta læknað kvíða og þunglyndi.

Þátturinn verður sýndur á Hringbraut í kvöld klukkan 20:00.