„Þegar kom að því að gera heimildarmynd var eiginlega ekki neitt annað í boði en að gera um hann Didda. Ég vissi að hann var búinn að vera götunni í yfir tvö ár en samt var hann alltaf svo jákvæður og hress. Mig langaði að sýna fólki þá hlið á þessu lífi,“segir Elfar Þór Guðbjartsson kvikmyndagerðarnemi. Sigurbjörn Blöndal Sigurbjörnsson, sem var á sínum tíma eini heimilislausi maðurinn í Reykjanesbæ var uppspretta heimildarmyndar sem Elfar frumsýndi í námi sínu við Kvikmyndaskóla Íslands nú í vor. Kveðst Elfar vilja gefa þeim sem minna mega sín rödd og segir fólk geta lært margt af sögu Didda.
Elfar Þór stundar nám í handritsgerð og leikstjórn við Kvikmyndaskóla Íslands en hann er fæddur og uppalin í Njarðvík.
„Hugmyndin að myndinni kemur bara því að ég þekki Didda frá fyrra líferni mínu sem mér tókst að koma mér úr áður en ég fór útí kvikmyndagerð. Það má á eiginlega segja að kvikmyndaskólinn hafi bjargað lífi mínu,“ segir Elfar í samtali við DV.is.
Diddi var heimilislaus í þrjú ár þar til honum var útveguð íbúð í Reykjavík á vegum félagsyfirvalda. Hann er að sögn Elfars vel þekktur í heimabæ sínum.
„Það allavega föttuðu allir um hvern ég var að tala þegar ég sagðist vera að gera mynd um eina heimilislausa manninn í Reykjanesbæ. Hann er vanur að labba mikið á hafnargötunni sem er aðalgata Keflavíkur. Þegar ég var yngri þá tók hann alltaf gítarinn þegar ég kíkti á hann og söng fyrir mig lagið Isabella sem var uppáhalds lagið mitt eftir hann. Mér þótti alltaf rosalega vænt um það.“
Elfar bætir við að við gerð myndarinnar hafi komið í ljós að margir bæjarbúar hugsa hlýtt til Didda.
„Það er augljóst að hann er vel liðinn og að mörgum þykir vænt um kallinn. Ég var virkilega ánægður að sjá hvað fólki er ekki sama og hvað fólk er kærleiksríkt í sér, einsog sést á öllum þeim sem koma fram í myndinni.“
Titill myndarinnar „Bonjour mammon“ á sér ákveðna sögu.
„Myndin heitir Bonjour mammon eftir hljómsveit sem hann var í og gáfu þeir út plötu árið 1983,“ segir Elfar sem hyggur nú á gerð myndar í fullri lengd um ævi Didda. „Mig langar í raun að segja söguna hans frá byrjun til dagsins í dag. Hann er virkilega áhugaverður einstaklingur og hefur margt að segja. Við gætum lært mikið af honum.“
