Eiginmaður Kim Kardashian, tónlistarmaðurinn Kanye West, hefur gjarnan verið til umfjöllunar fjölmiðla hins ytra sem hérlendis fyrir sérkennilega framkomu og undarleg ummæli. Nýjasta útspil hans er að tilkynna að hann sé að íhuga að löglega breyta nafninu sínu tímabundið yfir í : Christian Genius Billionaire Kanye West, eða á íslensku Kristinn Snillingur Milljarðamæringur Kanye West.
Frá þessu greindi Kanye í óvæntri heimsókn á Fast Company Innovation hátíðina á þessu ári. Þar sagðist hann mögulega ætla að breyta nafni sínu með ofangreindum hætti.
„Þegar fólk segir að það sé heimskulegt að kalla sjálfan þig milljarðamæring, þá gæti ég löglega breytt nafni mínu í Kristinn Snillingur Milljarðamæringur Kanye West í eitt ár þar til þið skiljið öll hvað það er.“
Í fyrra vakti Kanye mikið umtal og fjaðrafok þegar hann deildi þeirri skoðun sinni að það væri val að vera þræll. Í forsíðumyndatöku fyrir tímaritið Rolling Stones árið 2006 líkti hann sjálfum sér við Jesú og ætlaði um tíma árið 2009 að breyta nafninu sínu í Martin Louis the King Jr. til að auglýsa strigaskóframleiðslu sína.
Efalaust hefði íslenska mannanafnanefndin ýmislegt út á mögulega nafnabreytingu Kanye að setja, þó blaðamaður gerist ekki svo kræfur að fullyrða eitt né neitt um það, enda hefur mannanafnanefnd nýlega bannað millinafnið Haukdal og eiginnafnið Kona , en hins vegar samþykkt eiginnafnið Gaston og Erlinda.
