„Ef ég myndi fara í greiningu yrði ég örugglega greindur með kvíða, þunglyndi, athyglisbrest, hvað það heitir, allt saman. Ég kann vel við sjálfan mig. Þess vegna vil ég ekki fara í neina greiningu eða fá neinar töflur, því það gæti breytt gaurnum sem ég kann svo vel við,“

segir Pétur Jóhann Sigfússon, leikari og grínisti. Pétur var gestur í hlaðvarpsþætti Snorra Björns og talar þar um námsárin, ferilinn, bíladellu, vináttuna við Jón Gnarr og hvernig það er að vera kvíðasjúklingur í sex-til-átta mínútur á dag.

„Ég vil ekki hvort ég vil nota orðið kvíði. Þetta er tímabundið og varir í svona átta mínútur. Það gæti dreifst samt. Það koma kannski tvær-þrjár mínútur á morgni, svo koma kannski tvær-þrjár seinnipartinn. Svo á kvöldin þegar ég leggst á koddann, þá fer ég að kvíða einhverju sem verður næsta dag, en þá sofna ég bara,“ segir Pétur.

„Grínlaust, þá lendi ég oft í því að keyra frá heimilinu og ætla kannski í Auðbrekku en ranka við mér í Skeifunni. Ég fer mjög oft út í búð og Sigrún, konan mín, er búin að segja mér nákvæmlega hvað ég á að kaupa, meira að segja búin að senda mér það í skilaboðum, en ég gleymi alltaf tveimur eða þremur hlutum. Þetta er minn raunveruleiki í gegnum lífið, en ég hef bara gaman af þessu.“

Hlustaði ekki á ráð Dodda litla

Pétur rifjar upp ferill sinn og fyrri störf og talar um breytinguna sem fylgdi því að gerast sjónvarpsleikari, en á undan því hafði hann unnið sem útvarpsmaður í fjögur ár. Hann segir taugarnar hafa sjaldan verið trekktari en þegar 70 mínútur var og hét. Þá var mætt til vinnu á hverjum degi með hjartað í buxunum og segir hann kvíðatímann hafa slegið í hálftíma hvern dag.

„Ég var nýkominn úr því að vera pakkaður inni í bómul þarna í útvarpinu. Þetta var allt annað gigg heldur en að fara á sundbol í gegnum bílaþvottastöð, það var það fyrsta sem ég gerði í þættinum. Þetta var innvígslan,“ segir Pétur, sem var lengi efins um hvort ákvörðunin hafi verið sniðugt að segja skilið við útvarp. Samkvæmt Pétri hlustaði hann í staðinn á hjartað og gríðarlegan sannfæringarkraft Auðuns Blöndal. Þá bætir hann við að Þórður Helgi Þórðarson, betur þekktur sem Doddi litli, hafði ráðlagt sér að þiggja ekki starfið í 70 mínútum. „Hann sagði mér eindregið að sleppa þessu og sagði að ég væri að gera rangt.“