Listakonan Margrét Erla Maack á von á barni á næstu dögum. Líkt og DV greindi frá í september fær hún ekki háar greiðslur úr fæðingarorlofssjóði og hefur því leitað á náðir Karolina fund til að safna fyrir orlofinu.
Hún fékk að vita síðastliðinn fimmtudag að hún myndi aðeins fá 158 þúsund krónur á mánuði í fæðingarorlof, þar sem hún sé stundum sjálfstætt starfandi og stundum launamanneskja, en kerfið geri ekki ráð fyrir fólki sem falli ekki inn í kassann, þó svo það greiði sinn skatt til jafns við aðra:
„Þetta er náttúrulega undir lágmarkslaunum og einhverjum mörkum sem ríkisstjórnin sjálf hefur sagt að sé lágmarksframfærsla,“
segir Margrét við Morgunblaðið.
Hún nefnir einnig að víða sé fólk í kerfinu sem fái afar takmarkaðar greiðslur úr sjóðnum, til dæmis frumkvöðlar og fólk sem sé að reyna að koma af stað eigin rekstri og því sé þannig refsað fyrir að greiða sér lág laun meðan verið sé að koma fótunum undir sig:
„Fjárhagskvíði er ekki eitthvað sem þú vilt vera að kljást við með lítið barn.“
Margrét hefur óskað eftir viðtali við félags- og barnamálaráðherra, Ásmund Einar Daðason, en hefur ekki fengið viðtalstíma ennþá:
„Ég myndi vilja segja frá minni stöðu og stöðu fólks sem hefur talað við mig. Það þarf að gera kerfið skýrara og auðveldara fyrir þá sem eru ekki inni í kassa. Svo er líka spurning hvort maður ætti líka að tala við iðnaðarráðherra. Hún segir að frumkvöðlar séu lausnin og frumkvöðlaaldurinn og barneigna.“
Hægt er að styrkja Margréti á Karolina fund með því að smella hér.