Söngkonan og raunveruleikastjarnan Kerry Katona hefur verið mikið á milli tannanna á fólki síðustu tvo áratugi, eða allt síðan hún gekk til liðs við stúlknasveitina Atomica Kitten árið 1998. Hún yfirgaf sveitina árið 2001, gekk til liðs við hana aftur árið 2012 en sagði endanlegt bless árið 2017. Auk þess hefur hún verið dugleg að taka þátt í alls kyns raunveruleikaþáttum.
Kerry hefur oft fengið að heyra gagnrýni á útlit sitt, bæði frá aðdáendum og ensku slúðurpressunni. Hún virðist hins vegar hafa fengið nóg eftir að nettröll hökkuðu hana í sig eftir að myndir náðust af henni á sundfötunum ásamt kærasta sínum Ryan Mahoney á Taílandi.
„Það er ekki stærðin sem er málið heldur er það andlitið og allar lýtaaðgerðirnar sem hún hefur farið í og því er líkaminn skringilega rifflaður. Þetta er það sem gerist þegar þú ert löt og svindlar,“ skrifar einn til Kerry, en hún birtir nokkrar af ógeðfelldustu orðsendingunum á Instagram-síðu sinni.
„Ég veit ekki hvar ég á að byrja. Fyrst eru það gervilegu kviðvöðvarnir, síðan varirnar, hárið og listinn heldur áfram. Ég held að hún hafi verið að reyna vera stelpa að sýna sundföt – það misheppnaðist skelfilega,“ skrifar annað nettröll.
https://www.instagram.com/p/B2W6Pl0lXRQ/
Kerry birtir netnöfn tröllanna á Instagram og svarar rækilega fyrir mig.
„Mig langaði bara að deila hve hræðilega illkvittið fólk getur verið með orðin að vopni,“ skrifar Kerry og heldur áfram. „Ég er með geðhvarfasýki, ég hef gert mistök, ég er manneskja, ég er með tilfinningar, ég hef lent í ástarsorg, ég er móðir og ég er kona. Ég geri mitt besta.“
Hún segir að skemmtanabransinn taki vissulega sinn toll.
„Við verðum ekki ómennsk með að vera í sviðsljósinu og við höfum ekki ofurkrafta þar sem við getum hætt að taka hluti persónulega. Mig langar að þið vitið hve grimmur heimurinn er sem við lifum í. Sem betur fer er ég sterk manneskja. Ég hef verið í bransanum í tuttugu ár og hef lært að takast á við þetta,“ skrifar hún. „Það hefur tekið mig mjög langan tíma í að fatta að álit annarra á mér skilgreina mig ekki sem manneskju. Líkami minn segir sögu; sögu ástar, særinda, mistaka, barna. Ég er elska tígrarendurnar mínar (slit – innsk. blaðamanns) og síðan veltir fólk því fyrir sér af hveru við leggjumst undir hnífinn!!!!“
https://www.instagram.com/p/B2XRNNbFRzJ/
Kerry veltir einnig fyrir sér hvort fólk myndi þora að segja allt þetta við hana úti á götu.
„Ef þér líkar ekki eitthvað sem þú sérð, af hverju hundsarðu það ekki í staðinn fyrir að spúa út nafnlausu hatri um fólk sem þú þekkir ekki?! Orðin geta verið kröftugri fyrir fólk með geðsjúkdóma en líkamlegt ofbeldi.“
Síðustu vikur hafa verið erfiðar hjá Kerry þar sem fyrrverandi eiginmaður hennar, George Kay, lést í síðasta mánuði vegna ofneyslu.
