Tillögu Sjálfstæðisflokksins um að undirbúa útboð vegna ljósastýringar og snjallvæðingar í umferðarstýringu á höfuðborgarsvæðinu var vísað frá á fundi borgarstjórnar í gær, að tillögu borgarstjóra, Dags B. Eggertssonar.
Eyþór Arnalds, oddviti borgarstjórnarflokks Sjálfstæðisflokksins, segir þetta undarleg vinnubrögð hjá meirihlutanum:
„Það lýsir litlu hugrekki að vísa þessari mikilvægu tillögu frá. Betra hefði verið að borgarfulltrúar hefði fengið að kjósa um hana. Snjallvæðing umferðarinnar er eitt af helstu framfaraskrefum sem unnt er að taka í samgöngumálum í Reykjavík. Skref sem allar sambærilegar borgir í Evrópu hafa þegar tekið. Við vinnum áfram að því að tillagan verði að veruleika þó að borgarstjóri reyni að tefja málið, enda löngu kominn tími á að koma á nútímalegri ljósastýringu í borginni líkt og gert er í öðrum Evrópulöndum.“
Samtök iðnaðarins gerðu greiningu á þeim aðgerðunum sem settar voru fram í tillögu Sjálfstæðisflokksins þar sem m.a. er horft til niðurstaðna nýlegs umferðarlíkans VSÓ fyrir höfuðborgarsvæðið og umferðarmælinga Vegagerðarinnar. Í greiningunni kemur fram að tæplega níu milljónum klukkustunda verði sóað í umferðartafir innan höfuðborgarinnar á árinu 2019, sem samsvarar fjörutíu klukkustundum á hvern íbúa í höfuðborginni.
„Fyrir stjórn Reykjavíkurborgar liggur tillaga um að borgarstjórn feli umhverfis- og skipulagssviði að undirbúa útboð vegna ljósastýringar og snjallvæðingar í umferðarstýringu. Áætlaður stofnkostnaður er um 1,5 ma.kr. en ávinningur áætlaður 15% tímasparnaður fyrir einkabíla, 50% minni biðtími ökutækja í biðröðum og 20% meira flæði almenningssamgangna,“
segir í úttekt Samtaka iðnaðarins.
Þá segir enn fremur í úttektinni að arðsemi ljósastýringa gæti verið töluverð „en það er mat Samtaka iðnaðarins að 15% minnkun í umferðartöfum í höfuðborginni með ljósastýringu muni skila um 80 milljörðum í ábata fyrir fyrirtæki og heimili á líftíma fjárfestingarinnar. Eru þar ótaldir aðrir ábataþættir á við minni loftmengun og sparnað í öðrum aksturskostnaði.“
