Ekki er lengur hægt að segja að hinn hræðilegi sjúkdómur ebóla sé ólæknandi segja vísindamenn. Þetta segja þeir í kjölfar tilrauna með fjögur lyf en tvö þeirra reyndust mjög áhrifarík gegn ebólu. Tilraununum var hrundið af stað á síðasta ári af Alþjóðaheilbrigðismálastofnuninni WHO og bandarísku smitsjúkdómastofnuninni.

The Guardian skýrir frá þessu. Fram kemur að rúmlega 90 prósent þeirra sem fengu lyfin hafi lifað þenna hræðilega sjúkdóm af. Tilraunum með lyfin hefur nú verið hætt og þau eru notuð af læknum sem annast ebólusmitað fólk.

„Framvegis getum við ekki sagt að ebóla sé ólæknanleg.“

Hefur The Guardian eftir Jean-Jacques Muyembe, hjá heilbrigðisyfirvöldum í Kongó. Hann sagði jafnframt að þessi árangur muni bjarga mörg þúsund mannslífum.

Vísindamenn segja að það muni aldrei takast að útrýma ebólu en nú hafi stórt skref verið stigið í baráttunni við hana og nú verði hægt að koma í veg fyrir stóra faraldra á afmörkuðum svæðum sem og á heimsvísu.