Gríðarlegur vandi steðjar nú að Argentínu. Svo stór að landið gæti hæglega orðið gjaldþrota. Vandræðin leystust úr læðingi á mánudaginn í kjölfar niðurstöður fyrri umferðar forsetakosninganna í landinu. Hægrisinnaði forsetinn Mauricio Macri tapaði þá stórt fyrir vinstrimanninum Alberto Fernandez og Cristina Fernandez de Kirschner, fyrrum forseta. Í kjölfar nötruðu fjármálamarkaðir og á mánudaginn lækkaði hlutabréfaverð um 48 prósent en þetta er mesta lækkun þess síðan 1950. Gengi argentínska pesósins féll um 15 prósent gagnvart Bandaríkjadal og á þriðjudaginn um sex prósent til viðbótar.

Margir óttast að landið stefni í þjóðargjaldþrot. IHS Markit greiningarstofnunin segir að staðan sé svo alvarlega að 72 prósent líkur séu á þjóðargjaldþroti á næstu fimm árum.

Ástæðan fyrir skjálftanum á fjármálamörkuðum er að fjárfestar óttast að ef Fernandez og de Kirschner komast til valda muni þau slíta samkomulagi um greiðslu á gríðarlegum skuldum landsins. Á þessu ári á landið að greiða 15,9 milljarða dollara af skuldum í erlendum gjaldmiðlum. Núverandi forseti gerði samning við Alþjóðagjaldeyrissjóðinn um hjálparpakka upp á 56 milljarða dollara. Fjárfestar óttast að þessu samstarfi verið slitið og að allt fari til fjandans í október.