Berjaya Land Berhad, malasíska fyrirtækjasamsteypan, mun greiða 53,6 milljónir dala, sem jafngilda um 6,7 milljörðum króna, fyrir 75% hlutafjár í Icelandair Hotels og þær fasteignir sem tilheyra rekstri hótelkeðjunnar miðað við núverandi stöðu veltufjármuna og vaxtaberandi skulda hótelkeðjunnar.

Markaður Fréttablaðsins skýrir frá þessu í dag. Stofnandi Berjaya Land Berhad er milljarðamæringurinn Vincent Tan sem er einna þekktastur fyrir að vera eigandi breska knattspyrnufélagsins Cardiff City.

Fram kemur í Markaðnum að kaupin séu einnig háð því að skuldir Icelandair Hotels veðri endurfjármagnaðar með nýjum lánum upp á 64 til 72 milljónir dala en það jafngildir um 8 til 9 milljörðum íslenskra króna. Markaðurinn segir að þetta komi fram í fréttatilkynningu sem Berjaya sendi malasísku kauphöllinni í fyrrakvöld.

Í tilkynningunni kemur fram að kaupin á meirihluta hlutafjár í Icelandair Hotels geri Berjaya kleift að hefja innreið á íslenskan markað fyrir lúxushótel og að ráð sé gert fyrir að hann vaxi enn frekar með tímanum.

Icelandair Hotels rekur þrettán hótel auk sumarhótelakeðjunnar Hótel Eddu. Tekjur fyrirtækisins náum 97 milljónum dollara, sem svarar til rúmlega 12 milljarða króna, á síðasta ári.