Íslendingur fannst látinn á gistiheimili í Kullu héraði í Hmachal Pradesh í Indlandi samkvæmt lögreglu á svæðinu. Í það minnsta er það fullyrt í indverskum fjölmiðlum.
Hann sagður hafa fundist látinn á baðherbergi í Acharya Villa gistiheimilinu í Vashisht svæðinu í borginni Manali.
Indverskir fjölmiðlar hafa eftir lögreglu þarlendis að nákvæm orsök andlátsins sé enn ókunn. Íslendingurinn ku hafa verið á gistiheimilinu síðan þann 29. júní.
Eigandi gistiheimilisins, Ankur Acharya, lét lögregluna vita af andlátinu.
Samkvæmt upplýsingum Business Standard var hann með vegabréfsáritun sem gilti til 29. mars árið 2020.
Samkvæmt fregnum frá Indlandi hefur íslenskum yfirvöldum verið tilkynnt um andlátið en ekki náðist í upplýsingafulltrúa utanríkisráðuneytsins við vinnslu fréttar.
(Uppfært)
DV náði tali af Sveini H. Guðmarssyni, upplýsingafulltrúi utanríkisráðuneytisins, sem sagðist ekki getað staðfest málið að svo stöddu.
(Uppfært)
Hvorki upplýsingafulltrúi utanríkisráðuneytisins né borgaraþjónusta utanríkisráðuneytisins hafa viljað tjá sig um málið og er erfitt að henda reiður á því hvort þau hafi upplýsingarnar staðfestar eða ekki. Aðstandandi mannsins sem talinn er vera látinn segist ekki hafa fengið lát hans staðfest.
DV hefur sent fyrirspurn til Guðmundar Árna Stefánssonar, sendiherra Íslands á Indlandi, um málið. Svar hans er að hann gefur ekki upplýsingar um það.
(Uppfært)
Samkvæmt frétt á Vísir.is er lögreglu í bænum ókunnugt um dánarorsökina en ekkert bendi til að dauða mannsins hafi borið að með saknæmum hætti. Hann mun hafa dvalist á gistiheimilinu í tæplega tvær vikur.
Guðmundur Árni Stefánsson, sendiherra Íslands á Indlandi, staðfestir að Íslendingur sé látinn á Indlandi. Hann segir jafnframt að ekkert grunsamlegt sé við lát mannsins samkvæmt upplýsingum frá lögreglu.
