Það eru góðir dagar og síður góðir dagar, ekki síst þegar fólk hefur sett sparifé sitt í óstöðugar myntir eins og rafmyntir. En það er algjör skítadagur þegar rafmyntamarkaðurinn, þar sem maður hefur dýrmætu rafmyntina sína, hverfur algjörlega.

Því fengu 246.000 viðskiptavinir Bitsane rafmyntamarkaðarins að kenna á nýlega. Bitsane hvarf skyndilega fyrir nokkrum dögum og þar með öll sú rafmynt sem var geymd hjá markaðnum. Forbes skýrir frá þessu.

Heimasíða markaðarins er ekki lengur virk og búið er að loka síðum fyrirtækisins á samfélagsmiðlum. Flest bendir til að hér hafi verið um þaulhugsað svikabragð að ræða. Það vekur síðan upp spurningar um hversu öruggt sé að fjárfesta í rafmynt og geyma á rafmyntamörkuðum sem þessum.

Nýlega gerðu tölvuþrjótar árás á norska Bitcoin Norge rafmyntamarkaðinn en í kjölfarið neyddist markaðurinn til að selja innistæður viðskiptavina sinna gegn vilja þeirra enda töpuðu þeir margir hverjum háum fjárhæðum á þessu.