Dómstóll Evrópusambandsins hefur kveðið upp úr um að sú ákvörðun pólskra stjórnvalda að lækka lífeyrisaldur hæstaréttardómara árið 2018 stríði gegn grundvallarstefnu ESB. Ekki hafi verið sýnt fram á að lækkun lífeyrisaldursins hafi þjónað löglegum tilgangi og því stríði hún gegn ákvæðum um sjálfstæði dómstóla.

Samkvæmt lögunum lækkaði lífeyrisaldur dómaranna úr 70 árum í 65 og náði einnig yfir þá dómara sem voru orðnir 65 ára í apríl 2018. Samkvæmt því sem kom fram fyrir dómstóli ESB náðu lögin til þriðjungs dómara pólska hæstaréttarins.

Dómararnir geta sótt um að fá að starfa lengur þrátt fyrir að hafa náð lífeyrisaldrinum en það er á valdi forseta landsins að samþykkja slíkar beiðnir eða hafna. Það stríðir að mati dómstóls ESB gegn grundvallaratriðum um þrískiptingu ríkisvaldsins og þar með réttarkerfis ESB.

Gagnrýnendur pólsku ríkisstjórnarinnar hafa lengi haldið því fram að lögin hafi ekki verið neitt annað en tilraun til að reyna að losna við gagnrýna dómara úr hæstarétti.