Það voru eflaust einhverjir sem tóku eftir því að eitthvað vantaði í miðbæ Reykjavíkur á þjóðhátíðardaginn, en þar var enga fornbíla að sjá.

Tíðkast hefur að Fornbílaklúbbur Íslands keyri bílalest niður Laugaveginn en sú var ekki raunin í ár.

Á Facebook-síðu klúbbsins er sagt frá ástæðunni fyrir þessari breytingu.

„Þessi breyting er fyrst og fremst gerð vegna þess að Reykjavíkurborg hefur bannað allan akstur bíla niður Laugaveg og gildir það bann einnig 17. júní.“

Þrátt fyrir þessa hindrun þá dó Fornbílaklúbburinn ekki ráðalaus en klúbburinn fór í samstarf við Hafnafjarðarbæ sem tók þeim fagnandi.

Fornbílaklúbburinn keyrði á undan skrúðgöngunni um Hafnarfjörðinn og lagði síðan bílunum til sýnis við Hafnarborg.

Eftir það var haldið á Árbæjarsafn þar sem bílunum var dreift um allt Árbæjarsafn til sýnis.