Lögreglan á Suðurnesjum hélt uppi sérstöku umferðareftirliti á Reykjanesbraut, við Flugstöð Leifs Eiríkssonar, í fyrrakvöld.
Í tilkynningu frá lögreglu segir að um 50 ökumenn hafi verið stöðvaðir og kannað með ástand og ökuréttindi þeirra. Einn ökumaður var grunaður um akstur undir áhrifum vímuefna og annar ók án þess að hafa endurnýjað ökuréttindin. Aðrir ökumenn voru með allt sitt á hreinu.
Lögregla hafði áður stöðvað á annan tug ökumanna á sama stað í sama tilgangi. Þá hlaut einn ökumaður tiltal sökum ökuhraða.
