Saksóknarar í Frakklandi eru sagðir krefjast þess að Björgólfur Guðmundsson, fyrrverandi stjórnarformaður Landsbankans, verði dæmdur í fimm ára fangelsi. Málið snýr að lánveitingum til eldri borgara skömmu fyrir hrun sem saksóknarar í Frakklandi segja hafa verið svindl.

Stundin greinir frá þessu og vísar í gögn ákæruvaldsins.

Málið hefur verið til meðferðar hjá frönskum áfrýjunardómstól að undanförnu en skemmst er að minnast fréttar RÚV frá 22. maí síðastliðnum þar sem fram kom að Björgólfur hafi gengið úr réttarsal.

Í fréttinni kom fram að Björgólfur væri einn níu sakborninga í málinu, en áður höfðu þeir allir verið sýknaðir. Málinu var áfrýjað og er áfrýjunin nú til meðferðar. Málið snýst um sérstaka tegund fasteignalána sem Landsbankinn í Lúxemborg veitti lífeyrisþegum.

Í frétt Stundarinnar kemur fram lánin hafi verið veitt gegn veðum í fasteignum þeirra, en þeir fengu aðeins hluta lánsfjárs greiddan út á meðan restin fór í fjárfestingar hjá Landsbankanum í Lúxemborg. Telja saksóknarar að í raun hafi verið um svindl að ræða. Fjármunir hafi til dæmis verið notaðir í annað en lofað var.

Hér má lesa nánar um málið.