Poppstjarnan Justin Bieber hefur skorað á stórleikarann Tom Cruise í slagsmál.
Bieber birti býsna áhugavert tíst á sunnudagskvöld þar sem hann skoraði á Cruise að mæta sér í MMA, eða blönduðum bardagalistum. Um er að ræða sömu íþróttagrein og Gunnar Nelson, einn okkar fremsti íþróttamaður, keppir í.
Í Twitter-færslunni sagði Bieber að ef Cruise myndi ekki slá til væri hann augljóslega hræddur.
Fjörugar umræður fóru af stað í kjölfarið og bauðst Conor McGregor til að sjá um að skipuleggja viðburðinn. Cruise er þekktur fyrir leik sinn í hasarmyndum á borð við Mission Impossible. Sagði McGregor að gaman yrði að sjá hvort Cruise sé jafn harður í raunveruleikanum eins og hann er á hvíta tjaldinu.
Þess má geta að veðbankar opnuðu á veðmál á bardagann í kjölfarið. Það er skemmst frá því að segja að Cruise var talinn mun líklegri til sigurs en Bieber. Ekkert hefur heyrst úr herbúðum Cruise um það hvort hann ætli að taka áskorun Biebers og mæta honum í búrinu.
Hvor heldur þú að myndi hafa betur, Justin Bieber eða Tom Cruise?
