Ofnbakað grænmeti er ofboðslega gott, sérstaklega ef það er baðað upp úr ólífuolíu og kryddi. En oft finnst manni maður ekki hafa tíma til að elda það og sumir hafa jafnvel lent í því að grænmetið verður frekar maukað heldur en stökkt og steikt.

Á vefsíðunni Real Simple er boðið upp á eldunarbrellu sem leysir þetta og hún er, eins og nafn vefsíðunnar gefur til kynna, afar einföld.

Það eina sem þarf að gera er að hita ofnplötuna sem grænmetið fer á inni í ofninum á meðan maður tekur til grænmetið. Best er að hita plötuna í ofninum í um tíu mínútur og setja grænmetið síðan á hana. Þetta sparar ekki aðeins tíma heldur byrjar grænmetið að eldast um leið og það snertir plötuna. Þá hjálpar þetta líka við að grænmetið eldast jafnt á alla kanta og verður stökt að utan en mjúkt að innan.

Virkilega sniðug brella þetta!