Svo virðist vera sem ákvörðun flugmanns að taka heimilishundinn með um borð í litla flugvél sem hann flaug hafi reynst dýrkeypt. Flugmaðurinn, hinn níræði Jerry Naylor, brotlenti vélinni á akri í Iowa í Bandaríkjunum árið 2017.

Rannsóknarnefnd flugslysa í Bandaríkjunum hefur nú lokið rannsókn á slysinu og kemst nefndin að því að hundurinn hafi átt stóra sök á því hvernig fór.

Jerry þessi var vanur flugmaður sem hafði meðal annars flogið farþegaþotum. Slysið varð þegar hann var að koma til lendingar í Monticello Regional-flugvellinum í Iowa.

Rannsóknarnefndin telur að skömmu áður en Jerry reyndi að lenda vélinni hafi hundurinn rekið sig í hallastýri og/eða kambstýri (e. aileron, stabilator) vélarinnar. Í kjölfarið virðist Jerry hafa misst stjórn á vélinni. Nefndin fann engin merki þess að bilun hafi átt sér stað í vélinni og telur hún að líklegasta orsök slyssins sé sú að hundurinn rak sig í fyrrnefndan búnað.

Hundurinn komst lifandi frá slysinu en Jerry var úrskurðaður látinn skömmu síðar.

Vélin var tveggja sæta og var flugstjórnarklefinn nokkuð þröngur. Hundur Jerrys var aftur á móti nokkuð stór, eða rúm 30 kíló.