Kona að nafni Sarah Gayton-Kay hefur gert allt vitlaust í Facebook-hópnum Mums Who Budget & Save, sem er samfélag ástralskra kvenna. Innan hópsins deila þær sparnaðarráðum sínum.

Sarah þessi hefur vakið mikla athygli eftir að hún sagðist ekki kaupa smjör heldur búa það til sjálf til að eiga alltaf nóg handa stórri fjölskyldu. Eina sem þarf er rjómi, blandari eða hrærivél og fimmtán mínútur.

Sarah segist nota þrjá lítra af rjóma til að búa til 1,3 kíló af smjöri og að það kosti hana rúmlega 260 krónur.

„Til að búa til smjör þá þeytið þið rjómann þar til hann skilur sig í smjör og súrmjólk,“ skrifar Sarah og segir þetta gerast eftir um það bil fimmtán mínútur í blandara eða hrærivélarskál. „Síðan þarf að skola smjörið til að tryggja að öll súrmjólkin sé skoluð af og þá er hægt að bæta við salti ef þess er óskað.“

Fjöldinn allur af konum hefur skrifað athugasemdir við færslu Söruh og finnst þetta algjört snilldarráð. Hins vegar gildir ekki það sama um Íslendinga þar sem þrír lítrar af rjóma kosta rúmlega 1500 krónur og 1,3 kíló af smjöri rúmlega 1000 krónur. Enginn sparnaður – en möguleiki á að búa til alls konar smjör með hvaða kryddi sem er.