Hryðjuverkasamtökin ISIS hafa kallað eftir því að fylgismenn samtakanna hefni fyrir hryðjuverkið í Christchurch á Nýja-Sjálandi í síðustu viku. Ástralinn Brenton Tarrant skaut 50 manns til bana og særði 50 til viðbótar í tveimur moskum í borginni.

Abu Hassan al-Muhajir, talsmaður ISIS, er sagður hafa látið frá sér 44 mínútna hljóðupptöku eftir hryðjuverkið í Christchurch þar sem hann hvatti til hefnda. New York Times greinir frá þessu og hefur eftir Abu að voðaverkið í Christchurch sé frekari sönnun þess að verið sé að reyna að knésetja ISIS.

Mjög hefur verið þrengt að ISIS í Sýrlandi og Írak og er yfirráðasvæði samtakanna nánast ekkert. Bendir Abu á að múslimar séu brenndir til dauða í Baghuz í Sýrlandi og verði fyrir árásum úr öllum áttum. Baghuz var eitt síðasta vígi ISIS en sýrlenski stjórnarherinn náði bænum á sitt vald í lok janúar.