Richard Z. Kruspe, gítarleikari hinnar alræmdu metal hljómsveitar Rammstein, gaf út á dögunum smáskífu með sólóverkefni sínu „Emigrate“. En þessi smáskífa inniheldur fimm remix af lagi hans „War“ og eitt af þeim lögum fólst í hendur tónlistarmannsins Joseph Cosmo Muscat að endurgera, en Joseph flytur tónlist undir nafninu SEINT.

Útgáfan fylgir fast á eftir tónlistarmyndbandi við rokk/metal smellinn sjálfan, sem kom nýverið út á YouTube en Joseph heldur ekki vatni yfir að hafa unnið með einu af átrúnaðargoðum sínum.

„Þessi gaur er algjörlega einn af mínum „íkonum.“ Ég er sjálfur úr metalsenunni og búinn að vera í rokkinu í mörg ár. Ég gleymi því aldrei þegar ég sá Rammstein í höllinni þrettán ára og um svipað leyti var ég sjálfur að byrja að spila í þungarokksbandi. Ég var með stjörnur í augunum þegar ég sá þessa menn og alveg ómetanlegt að fá að vinna fyrir einn þeirra mörgum árum seinna.“

Aðspurður hvernig verkefnið kom til segir Joseph að heppnin hafi verið þar að vopni og kom jafnframt í ljós í gegnum tengslanetið hversu lítill heimurinn væri.

„Ég fékk símtal einn dag fyrir rúmum mánuði síðan og voru það góðir vinir mínir Gunnar og Benni úr harðkjarna sveitinni Une misere. Þeir ljáðu mér þau tíðindi að upptökustjóra þeirra, Sky að nafni, vantaði góðan einstakling í verkið. Richard sagðist nefnilega ekki vilja fá bara hvern sem er. Strákarnir höfðu leyft Sky að heyra remix sem ég gerði fyrir Une misere árið 2017 og líkaði honum það mjög.“

Joseph segist hafa verið stressaður yfir því að fá viðbrögð Richards og var farinn að búast við öllu hinu versta áður en samþykkið kom, „enda var tíminn naumur sem mér var gefinn, þannig að ég rauk auðvitað strax í málið,“ segir hann. „Ég vissi auðvitað ekki hvernig hann tæki því þar sem ég setti smá SEINT vers í mixið. En það hefur greinilega fallið í kramið hjá honum.“

Hægt er að hlusta á remixið hér.