Það er sannarlega mikið gleðiefni að RÚV hafi aftur tekið til sýninga bresku gamanþættina Miranda því þeir eru alveg einstaklega fyndnir. Leikkonan Miranda Hart er handritshöfundur þáttanna og leikur jafnframt aðalhlutverkið. Hin hávaxna, klunnalega og seinheppna Miranda er einstök og það er ómögulegt annað en að heillast af henni. Hún er mjög sjarmerandi en gerir svo að segja ekkert rétt og er stöðugt að koma sér í vandræði. Þá grípur hún oft til þess að ýkja stórlega eða beinlínis ljúga til að bjarga sjálfri sér. Slíkt dugar hins vegar ekki, enda vitum við flest að lygar eiga til að vinda upp á sig og koma fólki í enn meiri vandræði en það var í áður. Þetta er Miranda stöðugt að reka sig á en virðist eiga erfitt með að læra af mistökum sínum.

Miranda getur ekki annað en komið manni í gott skap, svo stórskemmtileg er hún. Það lá vel á mér alla helgina vegna þess að Miranda var svo skemmtileg í sjónvarpinu á föstudagskvöldið. Það sló mjög á gleðina á sunnudag þegar ég horfði á endursýningu myndarinnar Vendipunktur þar sem stórleikarinn Leonardo DiCaprio fjallaði um loftslagsbreytingar af mannavöldum. Því lengur sem ég horfði því daprari varð ég því ég sá ekki betur en að mannkynið væri að ganga ansi rösklega til verks við að eyða sjálfu sér. Það er víst bara tímaspursmál hvenær það tekst. Ég hló á föstudagskvöld en andvarpaði þunglega á sunnudegi – hvað annað getur maður gert þegar maður uppgötvar að mannkyninu er ekki viðbjargandi.