Fréttablaðið skýrir frá þessu í dag. Haft er eftir Salóme að hún telji að fjölga þurfi nemum í heilsugæslulækningum á næstu árum til að anna eftirspurn. Í umsögn Félags heilsugæslulækna um heilbrigðisáætlun til 2030, sem liggur nú fyrir þinginu, kemur fram að mönnunarvandi sé nokkuð mikill og að úrbóta sé þörf.
”Það er skortur á heilsugæslulæknum á stórum svæðum úti á landi. Hún er brotakennd og það er stóra vandamálið. Það er verið að redda málunum með af leysingum til skamms tíma og er eiginlega ekki nútímafólki bjóðandi.”
Er haft eftir Salóme. Hún telur að efla þurfi heilsugæsluna á markvissan hátt á næstu árum og fjölga læknum. Nú séu um 200 heilsugæslulæknar á landinu en þurfi að vera um 400 til að við stöndumst samanburð við Norðurlöndin.
” Það er þannig að víðast hvar er miðað við að heimilislæknar séu þriðjungur lækna. Með því yrði heilsugæslan þessi grunnstoð sem allir tala um í hátíðarræðu. Þá er talað um heilsugæsluna sem grunnstoð heilbrigðiskerfisins.”
Segir Salóme og bendir á að reikningsdæmið sé ekki flókið. Nú séu um 200 heilsugæslulæknar á landinu. Helmingur þeirra láti af störfum á næsta áratug vegna aldurs. Átta heilsugæslulæknar séu útskrifaðir árlega. Hún segir að hæglega sé hægt að fjölga nemum í heilsugæslulækningum en það vanti fjármagn frá ríkinu til að það sé hægt.
