Nick Naydev, 27 ára karlmaður frá Vancouver í Washington-ríki Bandaríkjanna, mun ekki fá að fara aftur um borð í skemmtiferðaskipið Symphony of the Seas.

Ástæðan er frekar brjálæðislegt uppátæki sem Nick framkvæmdi fyrir skemmstu þegar hann stökk í sjóinn úr skipinu af elleftu hæð þess. Myndband af atvikinu hefur vakið talsverða athygli og má í raun segja að Nick sé heppinn að hafa sloppið án alvarlegra meiðsla.

Atvikið átti sér stað þegar skipið var við höfnina í Nassau á Bahamas. Skipið var kyrrstætt – sem betur fer – og viðurkennir Nick að hann hafi ekki getað gengið í þrjá daga eftir stökkið. Ástæðan var sú að hann var verulega aumur í rófubeininu og hálsinum.

Þegar upp komst um atvikið var honum og félögum hans, sem tóku stökkið upp, vísað umsvifalaust frá borði.

„Þetta var heimskuleg og kærulaus hegðun. Honum og fylgarliði hans hefur verið bannað að sigla með okkur aftur,“ sagði Royal Caribbean, rekstraraðili skipsins, í yfirlýsingu. Þá var tekið fram að fyrirtækið væri að hugleiða hvort hægt yrði að grípa til lagalegra aðgerða gegn Nick.

Í samtali við fjölmiðla sagði Nick að hann hafi verið drukkinn þegar hann ákvað að stökkva. Þeir félagarnir hafi setið að sumbli kvöldið áður og þegar hann vaknaði um morguninn – enn undir áhrifum – hafi hann ákveðið að stökkva.

Bátur sem átti leið hjá skammt frá tók Nick um borð og færði hann í land. Ekki liggur fyrir hversu hátt stökkið var en gera má ráð fyrir að það hafi verið tugir metra. Myndband af atvikinu má sjá hér að neðan en varla þarf að taka fram að þetta er eitthvað sem enginn ætti að leika eftir.