Júlíus Vífill Ingvarsson, fyrrverandi borgarfulltrúi Sjálfstæðisflokksins, hefur verið dæmdur í tíu mánaða skilorðsbundið fangelsi í Héraðsdómi Reykjavíkur. Frá þessu var greint á vef RÚV en þar segir að dómurinn sé skilorðsbundinn til tveggja ára.
Júlíus var ákærður fyrir peningaþvætti og sagður hafa þvættað um 50 milljónir króna í gegnum sjóð, sem hann var rétthafi að ásamt eiginkonu og börnum, í tengslum við viðskipti bílaumboðs Ingvars Helgasonar.
Saksóknari krafðist þess að Júlíus yrði dæmdur í átta til tólf mánaða fangelsi fyrir brotin. Rannsókn á málinu fór af stað eftir afhjúpun Kastljóss á Panamaskjölunum svokölluðu árið 2016.
Í frétt RÚV kemur fram að Júlíus Vífill hafi ekki verið viðstaddur dómsuppkvaðninguna.
