Sitt sýnist hverjum þegar kemur að arkitektúr, ekki síst í miðbænum, þar sem mikil uppbygging hefur verið síðustu ár. Í gær voru efstu þrjár tillögurnar um nýja viðbyggingu Stjórnarráðsins kynntar. Fyrstu verðlaun hlutu Ásmundur Hrafn Sturluson og Steinþór Kári Kárason hjá KURTOGPÍ og Garðar Snæbjörnsson, Jóhanna Høeg Sigurðardóttir og Ólafur Baldvin Jónsson.

Jóhannes Þór Skúlason, framkvæmdastjóri Samtaka ferðaþjónustunnar og fyrrverandi aðstoðarmaður Sigmundar Davíðs Gunnlaugssonar, er ekki par hrifinn af sigurtillögunni. Um húsið segir Jóhannes:

„En svona í alvörunni, hvað er flókið við að byggja annað hús í sama stíl aftan við íkonískasta hús miðbæjarins? Seriouslý? Var þetta teiknað í Austur-Þýskalandi um 1980? Þetta er ekki í neinu samhengi við neitt á þessu svæði. Bara ekkert! Það eina sem er gott við þetta hús er að er að það sést illa frá götunni. Nákvæmlega svona rugl er ástæðan fyrir því að Lækjargötusvæðið átti að vera fyrsta verndarsvæðið í byggð þegar lögin tóku gildi.“

Í svipaðan streng tekur Sveinn Andri Sveinsson, lögmaður:

„Ég veit það ekki.? Stjórnarráðið og Hverfisgata 6 eru ólík hús og er hálfgert brjálæði að setja hús með þriðja stílnum á milli í stað byggingar sem dregur svipmót sitt af öðru hvoru húsanna. Og af hverju þarf endilega að planta húsi á þennan litla reit í stað þess að þetta sögufræga hús fái að njóta sín eitt og sér?“

Ragnar Önundarson, viðskiptafræðingur, líkir húsinu við þekktan söngleik:

„Af einhverjum ástæðum kemur ,,litla hryllingsbúðin” upp í hugann.“

Alþingi samþykkti ályktun í október 2016 þar sem m.a. var kveðið á um að fela ríkisstjórninni að efna til samkeppi um hönnun viðbyggingar við Stjórnarráðshúsið og skipulag Stjórnarráðsreits. Þingsályktunin var samþykkt í tilefni aldarafmælis sjálfstæðis og fullveldis Íslands árið 2018.

Framkvæmdasýsla ríkisins hefur annast framkvæmd samkeppninnar fyrir hönd forsætisráðuneytisins. Alls bárust þrjátíu tillögur um hönnun viðbyggingar við Stjórnarráðshúsið og átta tillögur í samkeppnina um skipulag Stjórnarráðsreits.

Hér má sjá bækling um viðbyggingu Stjórnarráðsins
Hér má sjá bækling um Stjórnarráðsreit