Sunna Elvíra Þorkelsdóttir rifjar upp á Facebook kvöldið örlagaríka þegar hún lamaðist. Hún segist enn ekkert muna en vill þó ítreka að hún telji að fyrrverandi eiginmaður hennar, Sigurður Kristinsson, hafi ekkert komið nálægt því.
„Að gefnu tilefni langar mig að koma því á framfæri og ítreka það sem ég hef sagt áður að ég trúi því staðfastlega að Sigurður Kristinsson fyrrverandi eiginmaður minn og barnsfaðir hafi ekki átt neinn þátt í slysinu kvöldið örlagaríka þegar ég féll á milli hæðanna,“ segir Sunna Elvíra og vitnar í frétt Vísis um að lögregla rannsaki fall hennar enn.
Hún bætir við að þó hún segist ekkert muna þá vill hún láta staðar numið. „Þetta var bara hörmulegt slys. Kannski hrasaði ég, kannski gekk ég í svefni en Siggi kom þar hvergi nærri. Ég hef reynt að endurheimta minningar en án árangurs og hef ákveðið að láta staðar numið þar og halda áfram veginn,“ segir Sunna Elvíra.
Eins og frægt er orðið slasaðist Sunna Elvira alvarlega þegar hún féll fram af svölum á þáverandi heimili sínu í Malaga-borg á Spáni í janúar á þessu ári. Hvað átti sér stað ytra liggur ekki fyrir en afleiðingarnar voru skelfilegar. Sunna Elvira þríhryggbrotnaði við fallið og fékk að lokum þann úrskurð að hún væri lömuð til lífstíðar. Þjóðin fylgdist síðan agndofa með baráttu hennar og aðstandenda fyrir því að fá sómasamlega heilbrigðisþjónustu ytra og ekki síður að hún fengi ferðafrelsi til Íslands.
