Kona sem búsett er á höfuðborgsvæðinu datt svo sannarlega í lukkupottinn í seinasta mánuði. Konan var að taka til í veskinu sínu eitt kvöldið og fann þar miða sem hún hafði keypt í Happahúsinu á mikilli hraðferð í byrjun janúar. Um var að ræða vinningsmiðann í Lottó frá 13.janúar.

Í tilkynningu frá íslenskri getspá kemur fram að konan hafi stungið miðanum strax í veskið eftir að hún keypti hann og sökum mikilla anna var miðinn steingleymdur þar til framangreind tiltekt fór fram. Miðinn góði sem gaf vinning upp á rétt tæplega 15 milljónir króna var búinn að flækjast á hina ýmsu staði með eigandanum þar til hann skilaði sér til Getspár.

Konan mætti síðan á skrifstofu Getspár í vikunni og var aldeilis himinlifandi með „fundinn“. Þarna sannast að tiltekt getur svo sannarlega borgað sig líkt og fram kemur í tilkynningunni. Jafnframt er bent á að lottómiðar gilda í eitt ár frá útdráttardegi en um að gera að athuga miðana sína sem fyrst.