Ingólfur Benediktsson í Árnesi fann á dögunum heldur dularfullt flöskuskeyti í fjörunni fyrir neðan bæinn í Litlu-Ávík. Vegna vatnskemmda þá eru skilaboðin heldur torlesin en þau eru skrifuð á norsku. Þó má sjá að um er að ræða bréf frá tveimur stúlkum, Auroru og Elise.
Frá þessu er greint á Litla Hjalla, síðu sem greinir frá fréttum frá Árneshreppi. Fréttamaður þar, Jón Guðbjörn Guðjónsson, gerði sitt besta til að gera bréfin læsileg, en hann straujaði miðana. Ljóst er að bréfin voru skrifuð í fyrra því ártal er læsilegt.