Samkvæmt nýju fjármálafrumvarpi hækkar fjárframlagið til RÚV um 12,8 prósent, eða 534 milljónir, milli ára. Þar af eru 360 milljónir „í samræmi við tekjuáætlun um innheimtar tekjur af útvarpsgjaldi,“ en útvarpsgjaldið mun hækka um 2.5 prósent.
Alls fær RÚV 4,7 milljarða, en hvergi er minnst á framlög til annarra fjölmiðla, líkt og tillögur starfshóps menntamálaráðherra gerðu ráð fyrir, til að efla rekstrarumhverfi einkarekinna fjölmiðla. Þær tillögur voru kynntar á ríkisstjórnarfundi á föstudag, en hafa ekki verið gerðar opinberar.
Tillögurnar virðast ekki hafa náð inn í fjárlagafrumvarpið að þessu sinni, þó svo að í frumvarpinu segi að „unnið sé að aðgerðum á grundvelli úttekta og skýrslna um stöðu á íslenskum fjölmiðlamarkaði.“
RÚV var með jákvæða afkomu í fyrra upp á 321 milljón, en hagnaður af sölu á byggingarlóðum nam um tveimur milljörðum. Þá voru tekjur af sölu auglýsinga í kringum HM í knattspyrnu um 200 milljónir, en í heild nam hagnaður RÚV af sölu auglýsinga og kostunar um 2,3 milljörðum króna.
