Nánast allir ferðamenn sem koma hingað koma í gegnum Keflavíkurflugvöll og þar eru tvö íslensk flugfélög stærst en þessi tvö flugfélög hafa það sem meginstarfsemi að flytja fólk yfir hafið. Þetta er orðið tekjustýringarmál hvernig sætin í vélinni skiptast. Þetta er ekkert endilega gott fyrir ferðaþjónustan að vera í þeirri stöðu að það fari eftir markaðsaðstæðum í flugi yfir Atlantshafið hvernig þetta endar hér.

Þetta sagði Skarphéðinn Berg Steinarson í viðtali við morgunvaktina á Rás 1.

Þarna er komið að kjarna máls sem lítt hefur verið ræddur. Ferðaþjónustan hér hefur verið að byggjast upp nær eingöngu á forsendum flugfélaganna. Um áætlanir þeirra hefur lítið verið rætt. Þær hafa gengið út á að gera Ísland að tengimiðstöð milli Bandaríkjanna og Evrópu. Samhliða því hefur ríkisfyrirtækið Isavia ekki haft undan að stækka Keflavíkurflugvöll. Annars hefur öll stefnumörkun kringum ferðaþjónustuna verið mjög veik.

Nú er að koma í ljós hvað þessi flugstarfsemi er ótraust – og vöxtur flugfélaganna hugsanlega ósjálfbær. En þetta hefur haft í för með sér breytingu á eðli ferðamennskunnar sem máski er ekki sérlega hagfelld fyrir greinina. Ferðamennirnir sem hingað koma staldra við í styttri tíma, þeir dreifast ekki sérlega mikið um landið,  Evrópubúum hefur fækkað – það er til dæmis viðurkennt nú að Icelandair hafi vanrækt Evrópumarkaðinn.

Þetta hefur margvísleg önnur. Til dæmis er nefnt á hinum ágæta vef Túrista að farþegum hafi fækkað mikið í innanlandsflugi. Árni Gunnarsson, framkvæmdastjóri Air Iceland Connect, gefur þá skýringu að samsetning ferðamanna hafi breyst:

Mikil fækkun hefur orðið í komum ferðamanna frá Evrópu sem hefur áhrif á fjölda farþega í innanlandsflugi því þeir eru mjög stór hluti farþega yfir sumarmánuðina.

Þetta hefur reyndar verið nefnt margoft í pistlum hér á síðunni, hvað það er varasamt að láta flugfélögin ráða algjörlega ferðinni – eins og Skarphéðinn Berg ræddi í útvarpinu í morgun.