26 ára karlmaður nýtti sér aðstöðuna á bókasafninu í Vejle í Danmörku á mánudaginn til að prenta peningaseðla. Ekki er vitað hvort hann var svona illa staddur fjárhagslega eða vildi bara láta gamlan draum um að búa til peningaseðla rætast. Gestum og starfsfólki á bókasafninu fannst peningaprentunin í hæsta máta óeðlileg og tilkynntu lögreglunni um málið.

Lögreglumenn komu fljótlega á vettvang og gripu manninn glóðvolgan þar sem hann var að prenta út peningaseðla. Hann var þá búinn að prenta út 500 og 1.000 krónu seðla, í heildina 32.500 danskar krónur.

Vejle Amts Folkeblad segir að maðurinn hafi verið handtekinn. Allt að 12 ára fangelsi liggur við peningafalsi í Danmörku og dómar hafa fallið í nokkrum slíkum málum á undanförnum árum. Þyngstu dómarnir hafa verið tveggja ára fangelsi.