Eins og staðan er í dag stefnir í mikinn uppskerubrest í Danmörku í haust. Gríðarlegir þurrkar eru í landinu en varla hefur komið dropi úr lofti síðan í byrjun maí og hitinn hefur verið langt yfir meðallagi og sólskinsstundir óvenjulega margar. Kornakrar bænda fá að kenna á þessu og líta ekki vel út þessa dagana. Þurrkarnir eru þeir verstu síðan 1992 og allt stefnir í milljarðatap bænda í haust.

Margir bændur neyðast til að kaupa meira fóður handa búpeningi sínum en venjulega en það getur orðið dýrt því reiknað er með að fóðurverð muni hækka mikið vegna þurrkanna. Miklir þurrkar eru í ríkjunum við Eystrasalt og í Rússlandi og Úkraínu. Af þeim sökum má vænta þess að kornverð hækki og því munu bændur finna fyrir í rekstri sínum.

Uppskera danskra bænda var góð síðasta haust en nú stefnir í að minnsta kosti 25 prósent minni uppskeru en þá.