Theresa May, forsætisráðherra Bretlands, er reiðubúin til að framlengja aðild Breta að tollabandalagi ESB eftir 2020. The Telegraph skýrir frá þessu í dag. Ráðherrar frá ESB og Bretlandi vinna nú að gerð samkomulags um framkvæmd Brexit og þar með útgöngu Bretlands úr ESB. Fyrr í vikunni samþykktu breskir ráðherrar nýja neyðaráætlun sem á að koma í veg fyrir að tollgæsla og tollafgreiðsla verði tekin upp á landamærum Írlands og Norður-Írlands. Bretar höfðu áður hafnað hugmyndum ESB um hvernig á að leysa tollamálin.

Samkvæmt áætlun á Bretland að yfirgefa ESB í mars á næsta ári. Bæði ESB og Bretar eru sammála um að fríverslunarsamningar á milli Bretlands og ESB standi áfram óbreyttir til ársloka 2020.

Theresa May hefur sagt að Bretar muni yfirgefa tollabandalagið til að opna fyrir möguleika Breta á að gera eigin fríverslunarsamninga við önnur ríki. Ráðherrar í ríkisstjórn hennar eru þó ekki sammála um hvaða fríverslunarsamninga eigi að gera við ESB.