Friðrik Álfur Mánason hyggst bjóða sig fram í prófkjöri Pírata til Alþingiskosninganna. Hann sækist eftir 6-10.sæti í Reykjavík suður.

Á Facebook-síðu Pírataspjallsins segir hann vera pönkari, pabbi, verkamaður, anarkisti, listamaður, „bölvaður innflytjandi“ og ýmislegt fleira.

„Ég er einn af stoltum stofnendum Pírata á Íslandi og vil gera mitt til að viðhalda þeim anarkistahugmyndum sem enn leynast innan Pírata og vil þ.a.l koma á nýrri stjórnarskrá sem fyrst. Ég býð mig fram sem fulltrúi götulistafólks, bótaþega, tónlistarfólks og þeirra sem minna meiga sín í þjóðfélaginu. Enda hef ég sjálfur gengið í gegnum ýmislegt vegna þeirrar lífsstefnu sem ég fylgi. Ég stefni á það, fái ég kosningu, að Alþingi lögleiði frelsið, þ.e að frelsi einstaklingsins sé alltaf haft að leiðarljósi en það sé ekki verið að setja frelsinu skorður við hverja einustu lagasetningu, eins og nú er gert! Ég vil taka betur á þátttöku fyrirtækja í samfélaginu og setja græðgi hluthafa þeirra skorður til að fyrirtækin, rétt eins og við hin, standi undir rekstri ríkisins, “ segir Friðrik Álfur, sem einnig gengur undir viðurnefninu Svarti Álfurinn.

Friðrik Álfur veitti DV viðtal síðasta sumar en óhætt er að segja að hann hafi ekki bundið bagga sína sömu hnútum og samferðamennirnir.