Óhætt er að segja að tilraun tveggja Dana, 22 og 24 ára, til að svíkja fé út úr tryggingum hafi endað með ósköpum. Það var í október síðastliðnum að eldur kom upp í báti í Hróarskeldufirði við Sjáland í Danmörku.
Mennirnir tveir stukku í kjölfarið frá borði en ekki vildi betur til en að sá eldri, Tavab Khoshival, drukknaði. Við rannsókn málsins kom í ljós að eldurinn hafi verið kveiktur af mannavöldum og taldi lögregla fullvíst að ungu mennirnir hafi ætlað að svíkja fé út úr tryggingum.
Yngri maðurinn var í kjölfarið ákærður fyrir manndráp af gáleysi. Hann er sagður hafa vitað að félagi hans væri allt að því ósyndur og auk þess vissi hann sem var að björgunarvesti um borð voru ónýt. Báturinn var um 800 metra frá landi þegar eldurinn kom upp og var dýpi á þessum slóðum um sjö metrar.
Yngri maðurinn er talinn hafa skvett bensíni í vélarrúmi bátsins með þeim afleiðingum að sprenging varð. Sprengingin varð til þess að mennirnir stukku frá borði með fyrrgreindum afleiðingum. Þeim yngri tókst að synda í land en hinn drukknaði skömmu eftir að hafa lent í sjónum sem var rétt tæplega ellefu gráðu heitur.
Dómstóll í Danmörku hefur nú sakfellt yngri manninn fyrir manndráp af gáleysi. Hann var sakfelldur í desember síðastliðnum fyrir auðgunarbrot og dæmdur í tveggja ára fangelsi. Búist er við því að sex til átta mánuðir bætist við þann dóm.
