Joshua Kimmich, varnarmaður Bayern Munich segir að Cristiano Ronaldo, sóknarmaður Real Madrid sé besti knattspyrnumaður heims í dag.
Bayern tekur á móti Real Madrid í fyrri leik liðanna í undanúrslitum Meistaradeildarinnar á morgun klukkan 18:45.
Real Madrid sló Juventus úr leik í 8-liða úrslitum keppninnar en Ronaldo var magnaður í einvíginu og skoraði meðal annars eitt fallegasta mark sem sést hefur í Meistaradeildinni.
„Ef þú horfir á mörkin sem hann og Messi hafa skorað á ferlinum þá hefur Portúgalinn vinninginn,“ sagði Kimmich.
„Mörkin hans í Meistaradeildinni vega líka meira, hann hefur raðað þeim inn í keppninni, undanfarin ár. Messi er allt öðruvísi leikmaður en þegar að kemur að hinum fullkomna knattspyrnumanni hefur Ronaldo vinninginn.“
„Messi hleypur meira með boltann, Ronaldo er hættulegri á síðasta þriðjungnum. Ég er bara sáttur með að fá að fylgjast með þeim báðum á hátindi ferilsins,“ sagði hann að lokum.
