Unnur Brá segist ekki ætla í framboð í borginni, ekki Borgar Þór, ekki Ásdís Halla og ekki heldur Páll Magnússon. Þetta er fólkið sem hefur verið orðað við framboð síðasta misserið og er þá ekki eftir nema Eyþór Arnalds af þeim sem hafa verið nefndir – jú, og síðustu vikuna hefur heyrst nafn Jóns Karls Ólafssonar. Hann er ekki sérlega þekktur, hefur lengstum unnið við flugmál.

Fyrir utan borgarfulltrúana Áslaugu Friðriksdóttur og Kjartan Magnússon sem ætla að fara í leiðtogaprófkjörið. Undan þeim er stanslaust grafið með leitinni að frambjóðendum út um allan bæ – nei, reyndar út um allt land. Tilfinningin er sú að flokkurinn treysti þeim alls ekki.

Prófkjörið fer fram 27. janúar svo ekki er langur tími til stefnu. En það virðist einfaldlega vera svo að seta í borgarstjórn í Reykjavík þyki ekki sérlega freistandi kostur.